badan ko chang bana ruh ko rabab bana

badan ko chañg banā ruuh ko rabāb banā

sarāpā apnā bahut kaif-e-iztirāb banā

ik ishtihār kī sūrat meñ paḌh ke aage nikal

na apne vāste har shaḳhs ko kitāb banā

mire savāloñ ko sun le yahī bahut hogā

javāb de ke mujhe yuuñ na lā-javāb banā

fasurda rah ke hama-vaqt kyā milegā tujhe

kabhī kabhār to chehre ko tū gulāb banā

zamīr par jo paḌī barf hai pighal jaa.e

darūn-e-zehn koī aisā āftāb banā

kabhī to thoḌī sī halchal ho so.e jazboñ meñ

kabhī to Thahre samundar pe ik habāb banā

badan ko chang bana ruh ko rabab bana

sarapa apna bahut kaif-e-iztirab bana

ek ishtihaar ki surat mein paDh ke aage nikal

na apne waste har shaKHs ko kitab bana

mere sawalon ko sun le yahi bahut hoga

jawab de ke mujhe yun na la-jawab bana

fasurda rah ke hama-waqt kya milega tujhe

kabhi kabhaar to chehre ko tu gulab bana

zamir par jo paDi barf hai pighal jae

darun-e-zehn koi aisa aaftab bana

kabhi to thoDi si halchal ho soe jazbon mein

kabhi to Thahre samundar pe ek habab bana