badan mein rang bhare lahlha rahe hain charagh

badan meñ rañg bhare lahlhā rahe haiñ charāġh

mahak rahī hai fazā muskurā rahe haiñ charāġh

ujāle Duube hue haiñ ghane añdheroñ meñ

ajab safar hai bahut yaad aa rahe haiñ charāġh

ḳhudā kare ki unheñ ye milāp raas aa.e

havāoñ se jo ta.alluq baḌhā rahe haiñ charāġh

surūr-e-lams kā ab shaam lutf uThā.egī

ki din guzar gayā nazdīk aa rahe haiñ charāġh

tamām raat jale ab ye ḳhauf kaisā hai

havā-e-sub.h se dāman bachā rahe haiñ charāġh

vo de rahe haiñ hameñ bujh ke bhī payām-e-hayāt

hameñ añdheroñ meñ jiinā sikhā rahe haiñ charāġh

ujāle baañT rahe haiñ siyāh rātoñ ko

ye aur baat ki ḳhud ko jalā rahe haiñ charāġh

visāl-o-hijr ke mausam guzar ga.e ki 'bashīr'

jalā rahe haiñ na ham ab bujhā rahe haiñ charāġh

badan mein rang bhare lahlha rahe hain charagh

mahak rahi hai faza muskura rahe hain charagh

ujale Dube hue hain ghane andheron mein

ajab safar hai bahut yaad aa rahe hain charagh

KHuda kare ki unhen ye milap ras aae

hawaon se jo talluq baDha rahe hain charagh

surur-e-lams ka ab sham lutf uThaegi

ki din guzar gaya nazdik aa rahe hain charagh

tamam raat jale ab ye KHauf kaisa hai

hawa-e-subh se daman bacha rahe hain charagh

wo de rahe hain hamein bujh ke bhi payam-e-hayat

hamein andheron mein jina sikha rahe hain charagh

ujale banT rahe hain siyah raaton ko

ye aur baat ki KHud ko jala rahe hain charagh

visal-o-hijr ke mausam guzar gae ki 'bashir'

jala rahe hain na hum ab bujha rahe hain charagh