badan pe apne libas-e-azab pahne hue

badan pe apne libās-e-azāb pahne hue

chalā hai phir koī sahrā sarāb pahne hue

har ek shaḳhs kī nazroñ ko kar gayā uryāñ

ye kaun guzrā yahāñ se naqāb pahne hue

fasīl-e-jism ko barbād kar ke chhoḌegā

tumhāre hijr kā mausam hai aab pahne hue

havā chaman meñ har ik barg-e-tar se kahtī hai

kisī ko dekhā hai tum ne gulāb pahne hue

hamāre takiye pe kal niiñd sar paTaktī rahī

hamārī aañkh thī ek aisā ḳhvāb pahne hue

badan pe us ke jo is baar khil rahā hai bahut

qabā-e-ishq hai ḳhāna-ḳharāb pahne hue

ye hindavī to kabhī reḳhta rahī 'dilbar'

zabān-e-urdu hai kyā kyā ḳhitāb pahne hue

badan pe apne libas-e-azab pahne hue

chala hai phir koi sahra sarab pahne hue

har ek shaKHs ki nazron ko kar gaya uryan

ye kaun guzra yahan se naqab pahne hue

fasil-e-jism ko barbaad kar ke chhoDega

tumhaare hijr ka mausam hai aab pahne hue

hawa chaman mein har ek barg-e-tar se kahti hai

kisi ko dekha hai tum ne gulab pahne hue

hamare takiye pe kal nind sar paTakti rahi

hamari aankh thi ek aisa KHwab pahne hue

badan pe us ke jo is bar khil raha hai bahut

qaba-e-ishq hai KHana-KHarab pahne hue

ye hindawi to kabhi reKHta rahi 'dilbar'

zaban-e-urdu hai kya kya KHitab pahne hue