badan se laDte hue zid pe DaT gaya ek din

badan se laḌte hue zid pe DaT gayā ik din

jo ek dard thā āḳhir ko ghaT gayā ik din

hamāre chehre ko chhoḌo ye aisā dikhtā hai

ġhubār-e-vaqt se gar dil bhī aT gayā ik din

mizāj koī bhī rahtā nahīñ hai der talak

jo mujh se duur khaḌā thā lipaT gayā ik din

vo aabla mirī raftār jo baḌhātā thā

masāfatoñ meñ kahīñ par vo phaT gayā ik din

faqīh-e-shahr jise iḳhtilāf thā tujh se

sudhar gayā ki vo raste se haT gayā ik din

zavāl aatā hai sahrā pe aaj dekh liyā

jo mujh meñ phailā huā thā simaT gayā ik din

mujhe gumāñ thā ki merā hai sirf merā hai

vo ek dariyā thā rastoñ meñ baT gayā ik din

kināre thā to musalsal udaas thā 'sābir'

samundaroñ ko safīna palaT gayā ik din

badan se laDte hue zid pe DaT gaya ek din

jo ek dard tha aaKHir ko ghaT gaya ek din

hamare chehre ko chhoDo ye aisa dikhta hai

ghubar-e-waqt se gar dil bhi aT gaya ek din

mizaj koi bhi rahta nahin hai der talak

jo mujh se dur khaDa tha lipaT gaya ek din

wo aabla meri raftar jo baDhata tha

masafaton mein kahin par wo phaT gaya ek din

faqih-e-shahr jise iKHtilaf tha tujh se

sudhar gaya ki wo raste se haT gaya ek din

zawal aata hai sahra pe aaj dekh liya

jo mujh mein phaila hua tha simaT gaya ek din

mujhe guman tha ki mera hai sirf mera hai

wo ek dariya tha raston mein baT gaya ek din

kinare tha to musalsal udas tha 'sabir'

samundaron ko safina palaT gaya ek din