baDe KHulus se shaistagi se milta hai

baḌe ḳhulūs se shā.istagī se miltā hai

mirā harīf bhī mujh ko ḳhushī se miltā hai

mujhe vo in dinoñ zinda-dilī se miltā hai

ḳhushī yahī hai ki ab vo ḳhushī se miltā hai

sukūn dil ko to ab dard hī se miltā hai

ye lutf vo hai jo ham-sā.egī se miltā hai

na jaane in dinoñ kyoñ shaiḳh mai-gusāroñ se

baḌe niyāz baḌī ājizī se miltā hai

hai kār-e-nek har ik haal meñ jiye jaanā

mujhe ye hausla merī ḳhudī se miltā hai

ḳhalā-navard hue to pata chalā ham ko

yaqīñ kā rishta kahīñ bebasī se miltā hai

nahīñ hai koī bhī shai pā.edār duniyā meñ

vo ek dars jo ham ko ḳhushī se miltā hai

hamesha mujh se ye kahte haiñ shaiḳh mai pī kar

mirā mizāj faqat aap hī se miltā hai

zarā bhī farq nahīñ hai mizāj-e-'rāhat' meñ

vo āj-kal bhī usī sādgī se miltā hai

baDe KHulus se shaistagi se milta hai

mera harif bhi mujh ko KHushi se milta hai

mujhe wo in dinon zinda-dili se milta hai

KHushi yahi hai ki ab wo KHushi se milta hai

sukun dil ko to ab dard hi se milta hai

ye lutf wo hai jo ham-saegi se milta hai

na jaane in dinon kyon shaiKH mai-gusaron se

baDe niyaz baDi aajizi se milta hai

hai kar-e-nek har ek haal mein jiye jaana

mujhe ye hausla meri KHudi se milta hai

KHala-naward hue to pata chala hum ko

yaqin ka rishta kahin bebasi se milta hai

nahin hai koi bhi shai paedar duniya mein

wo ek dars jo hum ko KHushi se milta hai

hamesha mujh se ye kahte hain shaiKH mai pi kar

mera mizaj faqat aap hi se milta hai

zara bhi farq nahin hai mizaj-e-'rahat' mein

wo aaj-kal bhi usi sadgi se milta hai