baDh baDh ke bazm-e-naz se saghar uThae ja

baḌh baḌh ke bazm-e-nāz se sāġhar uThā.e jā

josh-e-junūñ meñ aur zarā laḌkhaḌā.e jā

bahke na yuuñ qadam ki koī rind kah sake

apnī nigāh-e-nāz se mujh ko pilā.e jā

bāda-kashī ke baa'd huiiñ ne'mateñ tamām

naqsh-e-ḳhayāl-e-ḳhām ko dil se miTā.e jā

māyūs ho ga.e haiñ jo is zindagī se aaj

lutf-e-hayāt kā unheñ muzhda sunā.e jā

tanhā.iyoñ kī bazm meñ zinda-dilī ke saath

apne ḳhayāl-o-ḳhvāb kī duniyā basā.e jā

chhalke na dast-e-shauq se sahbā-e-zindagī

is ehtiyāt se mai-o-mīnā luñDhā.e jā

'azm-o-yaqīñ ke saath sadā bazm-e-nāz meñ

husn-e-sitam-shi’ār se dāman bachā.e jā

miT jaa.eñ zindagī kī sabhī talḳhiyāñ agar

raqs-e-junūñ ke saath koī giit gaa.e jā

baDh baDh ke bazm-e-naz se saghar uThae ja

josh-e-junun mein aur zara laDkhaDae ja

bahke na yun qadam ki koi rind kah sake

apni nigah-e-naz se mujh ko pilae ja

baada-kashi ke ba'd huin ne'maten tamam

naqsh-e-KHayal-e-KHam ko dil se miTae ja

mayus ho gae hain jo is zindagi se aaj

lutf-e-hayat ka unhen muzhda sunae ja

tanhaiyon ki bazm mein zinda-dili ke sath

apne KHayal-o-KHwab ki duniya basae ja

chhalke na dast-e-shauq se sahba-e-zindagi

is ehtiyat se mai-o-mina lunDhae ja

'azm-o-yaqin ke sath sada bazm-e-naz mein

husn-e-sitam-shi’ar se daman bachae ja

miT jaen zindagi ki sabhi talKHiyan agar

raqs-e-junun ke sath koi git gae ja