baDh gai ye gardish-e-sar na-tawan chakkar mein hai

baḌh ga.ī ye gardish-e-sar nā-tavāñ chakkar meñ hai

ab zamīñ chakkar meñ hai yā āsmāñ chakkar meñ hai

maiñ vo bāda-nosh huuñ saaqī ki mujh ko dekh kar

ġhunche hairat meñ haiñ aur pīr-e-muġhāñ chakkar meñ hai

aaj hai us kī zabāñ par kal zabāñ par aap kī

gardish-e-qismat se merī dāstāñ chakkar meñ hai

jo haiñ goyā bazm-e-dushman meñ bhī vo ruktī nahīñ

biich meñ battīs dāñtoñ ke zabāñ chakkar meñ hai

ab kahāñ vo sāya-e-ashjār jis meñ sar chhupā.e

luuT kar gulzār ko bād-e-ḳhizāñ chakkar meñ hai

tiira dil ko sar chaḌhā kar ye samar hāsil huā

baaḌh aa.ī teġh par sang-e-fasāñ chakkar meñ hai

jo haiñ daanā pis rahe haiñ gardish-e-ayyām se

āshiyāñ kī tarah sar par āsmāñ chakkar meñ hai

chhoḌnā ghar baar kā hai mūjib-e-āvārgī

jism-e-be-jāñ ḳhaak meñ rūh-e-ravāñ chakkar meñ hai

gūñjte haiñ nāla-hā-e-qais koh-o-dasht meñ

ab kidhar le jaa.e naaqa sārbāñ chakkar meñ hai

hukm hai aane na paa.e ab sadā-e-sehr bhī

kis tarah roke havā ko pāsbāñ chakkar meñ hai

baDh gai ye gardish-e-sar na-tawan chakkar mein hai

ab zamin chakkar mein hai ya aasman chakkar mein hai

main wo baada-nosh hun saqi ki mujh ko dekh kar

ghunche hairat mein hain aur pir-e-mughan chakkar mein hai

aaj hai us ki zaban par kal zaban par aap ki

gardish-e-qismat se meri dastan chakkar mein hai

jo hain goya bazm-e-dushman mein bhi wo rukti nahin

bich mein battis danton ke zaban chakkar mein hai

ab kahan wo saya-e-ashjar jis mein sar chhupae

luT kar gulzar ko baad-e-KHizan chakkar mein hai

tera dil ko sar chaDha kar ye samar hasil hua

baDh aai tegh par sang-e-fasan chakkar mein hai

jo hain dana pis rahe hain gardish-e-ayyam se

aashiyan ki tarah sar par aasman chakkar mein hai

chhoDna ghar bar ka hai mujib-e-awargi

jism-e-be-jaan KHak mein ruh-e-rawan chakkar mein hai

gunjte hain nala-ha-e-qais koh-o-dasht mein

ab kidhar le jae naqa sarban chakkar mein hai

hukm hai aane na pae ab sada-e-sehr bhi

kis tarah roke hawa ko pasban chakkar mein hai