baDh gaya kuchh aur dil ka iztirab

baḌh gayā kuchh aur dil kā iztirāb

kyā sitam hai ai nigāh-e-bāryāb

ban ga.ī bujhte tabassum kā sharār

vo dam-e-ruḳhsat tirī chashm-e-pur-āb

ai ḳhushā vo dil ki jis kī har ḳhalish

hai mujassam kuchh sukūñ kuchh iztirāb

raat kī nīñdeñ huiiñ jin se harām

dekhtā huuñ un hasīñ rātoñ ke ḳhvāb

be-piye rahtā thā jab har dam surūr

haa.e vo sarmastī-e-ahd-e-shabāb

nashsha-e-dil se lahaktā thā chaman

āsmānoñ se barastī thī sharāb

mauj-e-naġhma ban ga.ī thī zindagī

baj rahe the dil meñ tā.ūs-o-raubāb

māhtāb-e-shauq hamrāh-e-safar

āftāb-e-kāmrānī ham-rikāb

vo nigāhoñ meñ qayāmat kā sukūñ

vo dhaḌakte dil meñ hashr-e-iztirāb

muddateñ guzrīñ magar ab tak 'jamāl'

yaad hai vo jāgtī āñkhoñ kā ḳhvāb

baDh gaya kuchh aur dil ka iztirab

kya sitam hai ai nigah-e-baryab

ban gai bujhte tabassum ka sharar

wo dam-e-ruKHsat teri chashm-e-pur-ab

ai KHusha wo dil ki jis ki har KHalish

hai mujassam kuchh sukun kuchh iztirab

raat ki ninden huin jin se haram

dekhta hun un hasin raaton ke KHwab

be-piye rahta tha jab har dam surur

hae wo sarmasti-e-ahd-e-shabab

nashsha-e-dil se lahakta tha chaman

aasmanon se barasti thi sharab

mauj-e-naghma ban gai thi zindagi

baj rahe the dil mein taus-o-raubab

mahtab-e-shauq hamrah-e-safar

aaftab-e-kaamrani ham-rikab

wo nigahon mein qayamat ka sukun

wo dhaDakte dil mein hashr-e-iztirab

muddaten guzrin magar ab tak 'jamal'

yaad hai wo jagti aankhon ka KHwab