baDha kar aankh ke tinke ko bhi shahtir karte hain

baḌhā kar aañkh ke tinke ko bhī shahtīr karte haiñ

chalo achchhā hai kuchh to vo mirī tash.hīr karte haiñ

jo uljhe haiñ unheñ vo aur bhī gambhīr karte haiñ

masā.il hal nahīñ karte haiñ bas taqrīr karte haiñ

sivā māyūsiyoñ ke kuchh unheñ hāsil nahīñ hotā

miTāne kī hameñ jo rāt-din tadbīr karte haiñ

hamāre kaun se ye kaam aa.egī batāo to

tumhāre naam aao dil kī ham jāgīr karte haiñ

nazar meñ raqs karte haiñ bahut se gum-shuda manzar

tumhārā naam jab kāġhaz pe ham tahrīr karte haiñ

mirī āñkhoñ meñ hī zauq-e-talab kī kuchh kamī hogī

vagarna jalva dikhlāne meñ kyoñ tāḳhīr karte haiñ

chalo sāhil pe chal kar dekhte haiñ dāstān-e-ġham

sunā hai Dūbne vaale bhī kuchh tahrīr karte haiñ

jinheñ pās-e-vafā muḳhtār az-had raas aatā hai

vahī aivān-e-ulfat ḳhuun se ta.amīr karte haiñ

baDha kar aankh ke tinke ko bhi shahtir karte hain

chalo achchha hai kuchh to wo meri tashhir karte hain

jo uljhe hain unhen wo aur bhi gambhir karte hain

masail hal nahin karte hain bas taqrir karte hain

siwa mayusiyon ke kuchh unhen hasil nahin hota

miTane ki hamein jo raat-din tadbir karte hain

hamare kaun se ye kaam aaegi batao to

tumhaare nam aao dil ki hum jagir karte hain

nazar mein raqs karte hain bahut se gum-shuda manzar

tumhaara nam jab kaghaz pe hum tahrir karte hain

meri aankhon mein hi zauq-e-talab ki kuchh kami hogi

wagarna jalwa dikhlane mein kyon taKHir karte hain

chalo sahil pe chal kar dekhte hain dastan-e-gham

suna hai Dubne wale bhi kuchh tahrir karte hain

jinhen pas-e-wafa muKHtar az-had ras aata hai

wahi aiwan-e-ulfat KHun se tamir karte hain