baDi hasin-o-tarab-za kitab paDhta hun

baḌī hasīn-o-tarab-zā kitāb paḌhtā huuñ

maiñ un kā qissa-e-auj-e-shabāb paḌhtā huuñ

kabhī kabhī to maiñ ik satr bhī nahīñ paḌhtā

kabhī kitāb ke bā'd-az-kitāb paḌhtā huuñ

ḳhat un kā haath meñ hai dil pe be-ḳhudī taarī

maiñ ḳhat kahāñ ḳhat-e-jām-e-sharāb paḌhtā huuñ

nazar se un kī milā kar nazar sar-e-mahfil

maiñ har savāl kā apne javāb paḌhtā huuñ

ridā-e-lāla-o-gul bhī kitāb kā hai varaq

maiñ is meñ qissa-e-husn-o-shabāb paḌhtā huuñ

kabhī to yuuñ bhī mirī zindagī lagī hai mujhe

ki jaise maiñ kisī majnūñ kā ḳhvāb paḌhtā huuñ

isī meñ mujh ko milā mere dard kā darmāñ

isī liye to maiñ ummul-kitāb paḌhtā huuñ

jo ḳhat bhī likhkhūñ to fauran javāb aatā hai

maiñ roz un kā javāb-ul-javāb paḌhtā huuñ

kise hai shauq 'jamālī' ġhazal sunāne kā

ba-hukm-e-sadr-e-fazīlat-ma.āb paḌhtā huuñ

baDi hasin-o-tarab-za kitab paDhta hun

main un ka qissa-e-auj-e-shabab paDhta hun

kabhi kabhi to main ek satr bhi nahin paDhta

kabhi kitab ke ba'd-az-kitab paDhta hun

KHat un ka hath mein hai dil pe be-KHudi tari

main KHat kahan KHat-e-jam-e-sharab paDhta hun

nazar se un ki mila kar nazar sar-e-mahfil

main har sawal ka apne jawab paDhta hun

rida-e-lala-o-gul bhi kitab ka hai waraq

main is mein qissa-e-husn-o-shabab paDhta hun

kabhi to yun bhi meri zindagi lagi hai mujhe

ki jaise main kisi majnun ka KHwab paDhta hun

isi mein mujh ko mila mere dard ka darman

isi liye to main ummul-kitab paDhta hun

jo KHat bhi likhkhun to fauran jawab aata hai

main roz un ka jawab-ul-jawab paDhta hun

kise hai shauq 'jamali' ghazal sunane ka

ba-hukm-e-sadr-e-fazilat-maab paDhta hun