baDi mushkil hain rahen sun mohabbat ki zamane mein

baḌī mushkil haiñ rāheñ sun mohabbat kī zamāne meñ

ki pal pal marnā paḌtā hai ise dil se nibhāne meñ

mohabbat se mile zaḳhmoñ ko maiñ gauhar samajhtā huuñ

izāfa hī izāfa hai mire dil ke ḳhazāne meñ

zarūrat ye nahīñ hai tum jise chāho tumheñ chāhe

koī tum shart mat rakhnā mohabbat āzmāne meñ

koī shiddat se chāhe to kabhī maġhrūr mat honā

dikhāve kī mohabbat kā chalan hai is zamāne meñ

zarūrat kī mohabbat meñ koī shiddat nahīñ hotī

chhalāvā hī chhalāvā hai use apnā banāne meñ

mohabbat gar nahīñ mujh se to ḳhvāboñ meñ bhī mat aao

mazā aatā hai kyā tum ko mirā dil yuuñ jalāne meñ

kabhī majnūñ se pūchho tum kabhī 'irshād' se pūchho

baḌā hī lutf aatā hai jigar par tiir khāne meñ

baDi mushkil hain rahen sun mohabbat ki zamane mein

ki pal pal marna paDta hai ise dil se nibhane mein

mohabbat se mile zaKHmon ko main gauhar samajhta hun

izafa hi izafa hai mere dil ke KHazane mein

zarurat ye nahin hai tum jise chaho tumhein chahe

koi tum shart mat rakhna mohabbat aazmane mein

koi shiddat se chahe to kabhi maghrur mat hona

dikhawe ki mohabbat ka chalan hai is zamane mein

zarurat ki mohabbat mein koi shiddat nahin hoti

chhalawa hi chhalawa hai use apna banane mein

mohabbat gar nahin mujh se to KHwabon mein bhi mat aao

maza aata hai kya tum ko mera dil yun jalane mein

kabhi majnun se puchho tum kabhi 'irshad' se puchho

baDa hi lutf aata hai jigar par tir khane mein