baDi mushkil kahani thi magar anjam sada hai

baḌī mushkil kahānī thī magar anjām saada hai

ki ab us shaḳhs kā ham se bichhaḌne kā irāda hai

aur is ke ba.ad ik aise hī lamhe tak hai ḳhāmoshī

hameñ dar-pesh phir se lamha-e-tajdīd-e-va.ada hai

suno raste meñ ik jaltā huā sahrā bhī aa.egā

kaho kab tak hamāre saath chalne kā irāda hai

hameñ āsāniyoñ se pyaar thā aur log kahte the

agar manzil se haT jaa.eñ to har rasta kushāda hai

sitāra-dar-sitāra TūTtā hai āsmāñ to bhī

tire qisse meñ bhī merī kahānī kā i.aada hai

maiñ huuñ nā-mo'tabar manzil kī ḳhātir mo'tabar rah par

vajūd-e-ḳhvāhish-e-jāñ par duāoñ kā libāda hai

kuchh aisī shiddatoñ se ham guzar kar aa.e haiñ 'ādil'

hameñ terī zarūrat bhī zarūrat se ziyāda hai

baDi mushkil kahani thi magar anjam sada hai

ki ab us shaKHs ka hum se bichhaDne ka irada hai

aur is ke baad ek aise hi lamhe tak hai KHamoshi

hamein dar-pesh phir se lamha-e-tajdid-e-wada hai

suno raste mein ek jalta hua sahra bhi aaega

kaho kab tak hamare sath chalne ka irada hai

hamein aasaniyon se pyar tha aur log kahte the

agar manzil se haT jaen to har rasta kushada hai

sitara-dar-sitara TuTta hai aasman to bhi

tere qisse mein bhi meri kahani ka iada hai

main hun na-mo'tabar manzil ki KHatir mo'tabar rah par

wajud-e-KHwahish-e-jaan par duaon ka libaada hai

kuchh aisi shiddaton se hum guzar kar aae hain 'adil'

hamein teri zarurat bhi zarurat se ziyaada hai