baDi pur-fan nigah-e-sharmagin malum hoti hai

baḌī pur-fan nigāh-e-sharmagīñ ma.alūm hotī hai

ġhazab Dhātī hai lekin dil-nashīñ ma.alūm hotī hai

fareb-e-va.ada-e-fardā kā itnā sehr hai mujh par

kabhī vo haañ bhī kah deñ to nahīñ ma.alūm hotī hai

yaqīñ thā aarzū niklegī dil se un ke aane par

magar kambaḳht vo ab tak yahīñ ma.alūm hotī hai

ajab kyā hai falak bhī dushmanī par ab utar aa.e

nazar us shoḳh kī kuchh ḳhashmagīñ ma.alūm hotī hai

bahut tākīd kī thī chashm-e-tar ko zabt-e-girya kī

magar bhīgī huī phir āstīñ ma.alūm hotī hai

mohabbat rafta rafta jaan kī dushman na ho jaa.e

abhī tak to bahut kaif-āfrīñ ma.alūm hotī hai

nahīñ samjhā na samjhe koī rutba ḳhāksārī kā

hameñ to hāsil-e-duniyā-o-dīñ ma.alūm hotī hai

hue haiñ paañv zaḳhmī hoshiyār ab ai dil-e-nādāñ

mujhe ye kū-e-qātil kī zamīñ ma.alūm hotī hai

kahīñ se maañg laa.ī hai balā kī shoḳhiyāñ 'sāhir'

ghaTā sāvan kī bhī kitnī hasīñ ma.alūm hotī hai

baDi pur-fan nigah-e-sharmagin malum hoti hai

ghazab Dhati hai lekin dil-nashin malum hoti hai

fareb-e-wada-e-farda ka itna sehr hai mujh par

kabhi wo han bhi kah den to nahin malum hoti hai

yaqin tha aarzu niklegi dil se un ke aane par

magar kambaKHt wo ab tak yahin malum hoti hai

ajab kya hai falak bhi dushmani par ab utar aae

nazar us shoKH ki kuchh KHashmagin malum hoti hai

bahut takid ki thi chashm-e-tar ko zabt-e-girya ki

magar bhigi hui phir aastin malum hoti hai

mohabbat rafta rafta jaan ki dushman na ho jae

abhi tak to bahut kaif-afrin malum hoti hai

nahin samjha na samjhe koi rutba KHaksari ka

hamein to hasil-e-duniya-o-din malum hoti hai

hue hain panw zaKHmi hoshiyar ab ai dil-e-nadan

mujhe ye ku-e-qatil ki zamin malum hoti hai

kahin se mang lai hai bala ki shoKHiyan 'sahir'

ghaTa sawan ki bhi kitni hasin malum hoti hai