badla hua duniya ka chalan dekh raha hun

badlā huā duniyā kā chalan dekh rahā huuñ

tahzīb ke māthe pe shikan dekh rahā huuñ

tū ne jo girā liiñ ruḳh-e-pur-nūr pe zulfeñ

sūraj ke bhī chehre pe gahan dekh rahā huuñ

vo mujh se vafāoñ kī sanad maañg rahe haiñ

maiñ jin ko yahāñ ahd-shikan dekh rahā huuñ

phūloñ meñ na pahlī sī vo ḳhushbū hai na vo rang

bhauñroñ ko giraftār-e-mehan dekh rahā huuñ

jis ahd meñ fankār kī izzat nahīñ baaqī

maiñ aaj vahī daur-e-fitan dekh rahā huuñ

sahrā ho ki gulzār girā detā hai bijlī

kyā taur tire charḳh-e-kuhan dekh rahā huuñ

ab rind bhī aise meñ badal jaa.eñ to behtar

badlā huā saaqī kā chalan dekh rahā huuñ

atvār zamāne ke ajab ho ga.e 'gauhar'

ismat kī kalā.ī meñ rasan dekh rahā huuñ

badla hua duniya ka chalan dekh raha hun

tahzib ke mathe pe shikan dekh raha hun

tu ne jo gira lin ruKH-e-pur-nur pe zulfen

suraj ke bhi chehre pe gahan dekh raha hun

wo mujh se wafaon ki sanad mang rahe hain

main jin ko yahan ahd-shikan dekh raha hun

phulon mein na pahli si wo KHushbu hai na wo rang

bhaunron ko giraftar-e-mehan dekh raha hun

jis ahd mein fankar ki izzat nahin baqi

main aaj wahi daur-e-fitan dekh raha hun

sahra ho ki gulzar gira deta hai bijli

kya taur tere charKH-e-kuhan dekh raha hun

ab rind bhi aise mein badal jaen to behtar

badla hua saqi ka chalan dekh raha hun

atwar zamane ke ajab ho gae 'gauhar'

ismat ki kalai mein rasan dekh raha hun