badli aisi zulf ki laT mein shamil kar ke uljhan koi

badlī aisī zulf kī laT meñ shāmil kar ke uljhan koī

merī ḳhātir baal sukhāne naap rahā hai āñgan koī

terah chaudah kī umroñ meñ lāzim hai mohtāt raheñ ham

kyā aisī phaltī umroñ ko kah saktā hai bachpan koī

mustaqbil meñ rafta-rafta ghul-mil kar afsāne hoñge

ab tak chalte-phirte jumle vo bhī rasman zimnan koī

us kī zulf kā lahrā lenā duur se kuchh aisā lagtā hai

chandan se gore shāne par jaise kaalī nāgan koī

faizān-e-sāqī se andar aate hī tārīfeñ ruḳhsat

maiḳhāne se bāhar aa kar koī shaiḳh barahman koī

ḳhalvat meñ bhī partav us kā us kā haala ban jaatā hai

be-parda mil aane vaalo biich meñ hogī chilman koī

sheroñ meñ iz.hār-e-haqīqat se iġhmāz kahāñ mumkin hai

'shād' mire tanzoñ se baḌh kar kab hai merā dushman koī

badli aisi zulf ki laT mein shamil kar ke uljhan koi

meri KHatir baal sukhane nap raha hai aangan koi

terah chaudah ki umron mein lazim hai mohtat rahen hum

kya aisi phalti umron ko kah sakta hai bachpan koi

mustaqbil mein rafta-rafta ghul-mil kar afsane honge

ab tak chalte-phirte jumle wo bhi rasman zimnan koi

us ki zulf ka lahra lena dur se kuchh aisa lagta hai

chandan se gore shane par jaise kali nagan koi

faizan-e-saqi se andar aate hi tarifen ruKHsat

maiKHane se bahar aa kar koi shaiKH barahman koi

KHalwat mein bhi partaw us ka us ka haala ban jata hai

be-parda mil aane walo bich mein hogi chilman koi

sheron mein izhaar-e-haqiqat se ighmaz kahan mumkin hai

'shad' mere tanzon se baDh kar kab hai mera dushman koi