badli badli ye zamane ki faza lagti hai

badlī badlī ye zamāne kī fazā lagtī hai

zindagī ab to hameñ jaise sazā lagtī hai

vo bhalā 'ishq kā iz.hār karegā kaise

jis ko ḳhud apnī adāoñ se hayā lagtī hai

jis kī nazroñ ne lagā.ī hai ye ātish dil meñ

yaad bhī us kī hameñ bād-e-sabā lagtī hai

raas aatī hai faqat ābla-pā.ī us ko

jis ko sahrā-e-mohabbat kī havā lagtī hai

sāmnā hotā hai jis lamha masā.il se kabhī

zindagī ham ko buzurgoñ kī du'ā lagtī hai

jaise bārūd pe baiThā hai zamāna saarā

maut meñ Duubī huī saarī fazā lagtī hai

uTh ga.ī jab se ye dīvār 'kashish' āñgan meñ

ghar kī tasvīr hameñ ghar se judā lagtī hai

badli badli ye zamane ki faza lagti hai

zindagi ab to hamein jaise saza lagti hai

wo bhala 'ishq ka izhaar karega kaise

jis ko KHud apni adaon se haya lagti hai

jis ki nazron ne lagai hai ye aatish dil mein

yaad bhi us ki hamein baad-e-saba lagti hai

ras aati hai faqat aabla-pai us ko

jis ko sahra-e-mohabbat ki hawa lagti hai

samna hota hai jis lamha masail se kabhi

zindagi hum ko buzurgon ki du'a lagti hai

jaise barud pe baiTha hai zamana sara

maut mein Dubi hui sari faza lagti hai

uTh gai jab se ye diwar 'kashish' aangan mein

ghar ki taswir hamein ghar se juda lagti hai