badr zahir ruKH se hai aasar-e-marg

'badr' zāhir ruḳh se hai āsār-e-marg

ishq kā āzār hai āzār-e-marg

band ho kar dīda-e-ibrat khule

samjhe ba.ad-e-marg ham asrār-e-marg

dahriye munkir ḳhudā ke hoñ to hoñ

kar nahīñ sakte magar inkār-e-marg

kyā bache umr-e-gurezāñ bhaag kar

tez-tar hai barq se raftār-e-marg

naza.a meñ huuñ jald kar do ḳhātma

lo nigāh-e-nāz se tum kār-e-marg

hijr kī dushvāriyāñ sahl us ne kī

marg merī yaar hai maiñ yār-e-marg

marne vaale parda-poshī karne haiñ

chhupte haiñ lekin kahīñ āsār-e-marg

sab barābar haiñ javān-o-tifl-o-pīr

lā-ubālī hai magar sarkār-e-marg

rāhzan kā naqd-e-jāñ ko Dar nahīñ

hai ajab hisn-e-hasīñ dīvār-e-marg

ḳhushk lab pathrā.īñ āñkheñ rang zard

'badr' chhupte haiñ kahīñ āsār-e-marg

'badr' zahir ruKH se hai aasar-e-marg

ishq ka aazar hai aazar-e-marg

band ho kar dida-e-ibrat khule

samjhe baad-e-marg hum asrar-e-marg

dahriye munkir KHuda ke hon to hon

kar nahin sakte magar inkar-e-marg

kya bache umr-e-gurezan bhag kar

tez-tar hai barq se raftar-e-marg

naza mein hun jald kar do KHatma

lo nigah-e-naz se tum kar-e-marg

hijr ki dushwariyan sahl us ne ki

marg meri yar hai main yar-e-marg

marne wale parda-poshi karne hain

chhupte hain lekin kahin aasar-e-marg

sab barabar hain jawan-o-tifl-o-pir

la-ubaali hai magar sarkar-e-marg

rahzan ka naqd-e-jaan ko Dar nahin

hai ajab hisn-e-hasin diwar-e-marg

KHushk lab pathrain aankhen rang zard

'badr' chhupte hain kahin aasar-e-marg