baghair bole mera muddaa samajhta hai

baġhair bole mirā mudda'ā samajhtā hai

purānā dost hai so mas.ala samajhtā hai

adhūrā chhoḌ ke kuchh din ko bhuul jaatā hai

kahāñ se joḌnā hai silsila samajhtā hai

to phir vo kaise farāmosh apnā 'aks kare

tumhārī āñkhoñ ko jo aa.ina samajhtā hai

havā kā shor ho yā bārishoñ kī aahaT ho

kivāḌ khaTke ko āvāz-e-pā samajhtā hai

charāġh jis ko mayassar nahīñ huā vo shaḳhs

bahut añdherā ho to rāsta samajhtā hai

kabhī-kabhār mulāqāt karne vaale batā

tū kis hisāb se ḳhud ko mirā samajhtā hai

uThā ke rakhtā hai ḳhud hī vo apnī chīzoñ ko

phir apne aap unheñ gum-shuda samajhtā hai

qadam baḌhā nahīñ saktā jo aage sidra se

hudūd jāntā hai muntahā samajhtā hai

baghair bole mera mudda'a samajhta hai

purana dost hai so masala samajhta hai

adhura chhoD ke kuchh din ko bhul jata hai

kahan se joDna hai silsila samajhta hai

to phir wo kaise faramosh apna 'aks kare

tumhaari aankhon ko jo aaina samajhta hai

hawa ka shor ho ya barishon ki aahaT ho

kiwaD khaTke ko aawaz-e-pa samajhta hai

charagh jis ko mayassar nahin hua wo shaKHs

bahut andhera ho to rasta samajhta hai

kabhi-kabhaar mulaqat karne wale bata

tu kis hisab se KHud ko mera samajhta hai

uTha ke rakhta hai KHud hi wo apni chizon ko

phir apne aap unhen gum-shuda samajhta hai

qadam baDha nahin sakta jo aage sidra se

hudud jaanta hai muntaha samajhta hai