baghair naqd-e-wafa zindagi ki qimat kya

baġhair naqd-e-vafā zindagī kī qīmat kyā

agar ḳhulūs nahīñ hai to phir mohabbat kyā

zabāñ pe pyaar kī bāteñ haiñ dil meñ kuchh bhī nahīñ

agar yahī hai mohabbat to phir mohabbat kyā

bas ik nigāh-e-navāzish hī terī kaafī hai

kuchh aur māñgne kī ab hameñ zarūrat kyā

ḳhulūs hogā to phir baat asar karegī zarūr

jo zindagī na badal de to phir nasīhat kyā

ye sab karam hī karam hai karam ke jalve haiñ

jo tū na chāhe to ham kyā hamārī shohrat kyā

kuchh aap apnī kaheñ aur kuchh hamārī suneñ

janāb itne takalluf kī ab zarūrat kyā

milā hai zar to ġharīboñ ke kaam bhī aao

na jis se ḳhidmat-e-maḳhlūq ho vo daulat kyā

ham apne daur kī haiñ jins-e-be-bahā logo

lagā sakegā zamāna hamārī qīmat kyā

koī nahīñ kisī girte ko thāmne vaalā

isī kā naam hai is daur meñ uḳhuvvat kyā

jo ek lamhe meñ duniyā hī chhoḌ de 'shākir'

us aadmī kī jo sach pūchhiye to qīmat kyā

baghair naqd-e-wafa zindagi ki qimat kya

agar KHulus nahin hai to phir mohabbat kya

zaban pe pyar ki baaten hain dil mein kuchh bhi nahin

agar yahi hai mohabbat to phir mohabbat kya

bas ek nigah-e-nawazish hi teri kafi hai

kuchh aur mangne ki ab hamein zarurat kya

KHulus hoga to phir baat asar karegi zarur

jo zindagi na badal de to phir nasihat kya

ye sab karam hi karam hai karam ke jalwe hain

jo tu na chahe to hum kya hamari shohrat kya

kuchh aap apni kahen aur kuchh hamari sunen

janab itne takalluf ki ab zarurat kya

mila hai zar to gharibon ke kaam bhi aao

na jis se KHidmat-e-maKHluq ho wo daulat kya

hum apne daur ki hain jins-e-be-baha logo

laga sakega zamana hamari qimat kya

koi nahin kisi girte ko thamne wala

isi ka nam hai is daur mein uKHuwwat kya

jo ek lamhe mein duniya hi chhoD de 'shakir'

us aadmi ki jo sach puchhiye to qimat kya