baha ke basti ko matla jo khul gaya sain

bahā ke bastī ko matla' jo khul gayā sā.īñ

qubūl ho ga.ī kahte ho vo du'ā sā.īñ

so itnā habs baḌhāyā gayā ki phir āḳhir

charāġh de ke ḳharīdī ga.ī havā sā.īñ

ye kin ḳhutūt pe dīvār ham ne khīñchī hai

koī burā nahīñ ham meñ nahīñ bhalā sā.īñ

qat.a huī haiñ zabāneñ ki bik ga.e haiñ suḳhan

zabān rakhte hue koī chup rahā sā.īñ

kareñ na kis liye ābād qatl-gāheñ ham

qatīl honā hī Thahrī agar jazā sā.īñ

kahāñ se qand ko lā kar zabān par rakhte

huī hai zahr se jo ālūda har fazā sā.īñ

du'ā.eñ kis liye māñgī thiiñ habs chhaTne kī

uḌā ke le ga.ī āñdhī mirī ridā sā.īñ

baha ke basti ko matla' jo khul gaya sain

qubul ho gai kahte ho wo du'a sain

so itna habs baDhaya gaya ki phir aaKHir

charagh de ke KHaridi gai hawa sain

ye kin KHutut pe diwar hum ne khinchi hai

koi bura nahin hum mein nahin bhala sain

qata hui hain zabanen ki bik gae hain suKHan

zaban rakhte hue koi chup raha sain

karen na kis liye aabaad qatl-gahen hum

qatil hona hi Thahri agar jaza sain

kahan se qand ko la kar zaban par rakhte

hui hai zahr se jo aaluda har faza sain

du'aen kis liye mangi thin habs chhaTne ki

uDa ke le gai aandhi meri rida sain