baha ke KHun-e-jigar lala-zar dekhenge

bahā ke ḳhūn-e-jigar lāla-zār dekheñge

ḳhizāñ meñ shoḳhī-e-rang-e-bahār dekheñge

ġham-e-firāq meñ kaaTī hai zindagī ham ne

kaThin hai kitnī shab-e-intizār dekheñge

bikhar ga.ī haiñ jo zulfeñ unheñ sañvāro to

zarā tamāsha-e-lail-o-nahār dekheñge

naqāb uThne pe anjām dekhiye kyā ho

abhī to hai ye havas baar baar dekheñge

nazārā dekhne aa.e haiñ ḳhud vo sāhil par

safīne hote haiñ kis tarah paar dekheñge

banegī apnī ḳhamoshī hī mudda.ā dil kā

kisī ko bazm meñ kyoñ sharm-sār dekheñge

hamāre baa'd ba-sad-yās kārvāñ vaale

kabhī ġhubār kabhī rahguzār dekheñge

ġham-e-firāq ke sho.aloñ ko aur tez karo

ham inqalāb-e-ġham-e-rozgār dekheñge

jalā ke bazm meñ 'nātiq' charāġh-e-dil rakh do

jo ahl-e-dard haiñ parvāna-vār dekheñge

baha ke KHun-e-jigar lala-zar dekhenge

KHizan mein shoKHi-e-rang-e-bahaar dekhenge

gham-e-firaq mein kaTi hai zindagi hum ne

kaThin hai kitni shab-e-intizar dekhenge

bikhar gai hain jo zulfen unhen sanwaro to

zara tamasha-e-lail-o-nahaar dekhenge

naqab uThne pe anjam dekhiye kya ho

abhi to hai ye hawas bar bar dekhenge

nazara dekhne aae hain KHud wo sahil par

safine hote hain kis tarah par dekhenge

banegi apni KHamoshi hi muddaa dil ka

kisi ko bazm mein kyon sharm-sar dekhenge

hamare ba'd ba-sad-yas karwan wale

kabhi ghubar kabhi rahguzar dekhenge

gham-e-firaq ke shoalon ko aur tez karo

hum inqalab-e-gham-e-rozgar dekhenge

jala ke bazm mein 'natiq' charagh-e-dil rakh do

jo ahl-e-dard hain parwana-war dekhenge