bahane DhunD ke late the yar ek se ek

bahāne DhūñD ke laate the yaar ek se ek

hamāre saath rahe ġham-gusār ek se ek

kahāñ kahāñ pe aqīdoñ se sar jhukā.e koī

qadam qadam pe haiñ parvardigār ek se ek

falak pe ho ki na ho ḳhāk-rū koī maujūd

zamīn par haiñ sitārā-shi.ār ek se ek

tumhīñ nahīñ ho namāz-e-shab-e-vafā ke amiin

paḌe hue haiñ tahajjud-guzār ek se ek

abhī to sirf ta.āqub mirī zamīn kā hai

abhī to hoñge havā meñ shikār ek se ek

kise kise maiñ banā.ūñ nigāh kā markaz

ki jaan ek hai aur jāñ-nisār ek se ek

koī na koī banā.egā ishq ke kuuze

vafā kā chaak salāmat kumhār ek se ek

ik aa.ine ne mire kaan meñ kahā 'harshit'

tumhī nahīñ haiñ yahāñ dāġhdār ek se ek

bahane DhunD ke late the yar ek se ek

hamare sath rahe gham-gusar ek se ek

kahan kahan pe aqidon se sar jhukae koi

qadam qadam pe hain parwardigar ek se ek

falak pe ho ki na ho KHak-ru koi maujud

zamin par hain sitara-shiar ek se ek

tumhin nahin ho namaz-e-shab-e-wafa ke amin

paDe hue hain tahajjud-guzar ek se ek

abhi to sirf taaqub meri zamin ka hai

abhi to honge hawa mein shikar ek se ek

kise kise main banaun nigah ka markaz

ki jaan ek hai aur jaan-nisar ek se ek

koi na koi banaega ishq ke kuze

wafa ka chaak salamat kumhaar ek se ek

ek aaine ne mere kan mein kaha 'harshit'

tumhi nahin hain yahan daghdar ek se ek