bahaar aai gul-afshani ke din hain

bahār aa.ī gul-afshānī ke din haiñ

hamārī tañg-dāmānī ke din haiñ

anādil kī ġhazal-ḳhvānī ke din haiñ

guloñ kī chāk-dāmānī ke din haiñ

jidhar dekho khile haiñ lāla-o-gul

ye ḳhūn-e-dil kī arzānī ke din haiñ

huā dāmān-e-gul dāmān-e-yūsuf

nazar kī pāk-dāmānī ke din haiñ

subuk-rau hai nasīm-e-rūh-parvar

magar phir bhī girāñ-jānī ke din haiñ

dil-e-pur-dard umDā aa rahā hai

ye bahr-e-ġham meñ tuġhyānī ke din haiñ

yahī din mā-hasal haiñ zindagī ke

yahī jo dil kī nādānī ke din haiñ

jamāl-e-zindagī kī ḳhair yārab

kamāl-e-aql-e-insānī ke din haiñ

ġhazal pākīza hai fazlī abhī tak

ye din har-chand uryānī ke din haiñ

bahaar aai gul-afshani ke din hain

hamari tang-damani ke din hain

anadil ki ghazal-KHwani ke din hain

gulon ki chaak-damani ke din hain

jidhar dekho khile hain lala-o-gul

ye KHun-e-dil ki arzani ke din hain

hua daman-e-gul daman-e-yusuf

nazar ki pak-damani ke din hain

subuk-rau hai nasim-e-ruh-parwar

magar phir bhi giran-jaani ke din hain

dil-e-pur-dard umDa aa raha hai

ye bahr-e-gham mein tughyani ke din hain

yahi din ma-hasal hain zindagi ke

yahi jo dil ki nadani ke din hain

jamal-e-zindagi ki KHair yarab

kamal-e-aql-e-insani ke din hain

ghazal pakiza hai fazli abhi tak

ye din har-chand uryani ke din hain