bahaar aai hai phir gul-posh hoga gulsitan apna

bahār aa.ī hai phir gul-posh hogā gulsitāñ apnā

qafas meñ yaad aatā hai mujhe ab āshiyāñ apnā

na ab apnī zamīñ hai aur na hai ab āsmāñ apnā

batā phir terī duniyā meñ Thikānā hai kahāñ apnā

chaman apnā na gul apne na hai ab āshiyāñ apnā

ḳhudā kī shaan dushman ho gayā saarā jahāñ apnā

yahāñ uThtā nahīñ hai paañv fart-e-nā-tavānī se

vahāñ chalne ko hai tayyār mīr-e-kārvāñ apnā

isī ummīd hī meñ jaan dī hai marne vaale ne

ab aa.egā ab aa.egā masīhā-e-zamāñ apnā

qafas to kyā hai jal jā.egā ye saarā jahāñ sayyād

qayāmat hai qayāmat nāla-e-shoa.la-fishāñ apnā

ḳhudā rakkhe ajab shai hai ye yak-rangī mohabbat kī

samajhte haiñ bayāñ terā jo kahtā huuñ bayāñ apnā

bahut sunte rahe ho qais aur farhād ke qisse

suno to aaj 'fāzil' bhī sunā.e kuchh bayāñ apnā

bahaar aai hai phir gul-posh hoga gulsitan apna

qafas mein yaad aata hai mujhe ab aashiyan apna

na ab apni zamin hai aur na hai ab aasman apna

bata phir teri duniya mein Thikana hai kahan apna

chaman apna na gul apne na hai ab aashiyan apna

KHuda ki shan dushman ho gaya sara jahan apna

yahan uThta nahin hai panw fart-e-na-tawani se

wahan chalne ko hai tayyar mir-e-karwan apna

isi ummid hi mein jaan di hai marne wale ne

ab aaega ab aaega masiha-e-zaman apna

qafas to kya hai jal jaega ye sara jahan sayyaad

qayamat hai qayamat nala-e-shoala-fishan apna

KHuda rakkhe ajab shai hai ye yak-rangi mohabbat ki

samajhte hain bayan tera jo kahta hun bayan apna

bahut sunte rahe ho qais aur farhad ke qisse

suno to aaj 'fazil' bhi sunae kuchh bayan apna