bahaar aane pe gulshan mein ajab ye majra hoga

bahār aane pe gulshan meñ ajab ye mājrā hogā

koī dāman guloñ se koī kāñToñ se bharā hogā

ba-roz-e-hashr jab us se hamārā sāmnā hogā

ham us ko dekhte hoñge vo ham ko dekhtā hogā

unhīñ ko haq hai jiine kā jo marne se na ghabrā.eñ

jo jiine se bhī ghabrā.eñ vo mar jaa.eñ to kyā hogā

tujhe apnā kahūñ ġhairoñ kī mahfil meñ ye nā-mumkin

kabhī haañ be-ḳhudī meñ maiñ ne aisā kah diyā hogā

tirā hī naam hai lab par tirā hī dhyān hai dil meñ

ḳhudā kah duuñ tujhe hamdam to kyā ye nāravā hogā

na aanā ho to ḳhvāboñ meñ bhī aap aa.eñ na ab hargiz

kisī furqat ke maare par karam ye aap kā hogā

mirā honā na honā hai tumhārī bazm meñ yaksāñ

na thā to tum ko kyā ġham thā na hūñgā maiñ to kyā hogā

muqaddar to muqaddar hai sar-e-taslīm ḳham kar de

burā hogā bhalā hogā tirī koshish se kyā hogā

hameñ bhī dekh leñ ik din kabhī vo mehrbāñ ho kar

hamārī zindagī meñ 'sehr' kyā ye mo.ajiza hogā

bahaar aane pe gulshan mein ajab ye majra hoga

koi daman gulon se koi kanTon se bhara hoga

ba-roz-e-hashr jab us se hamara samna hoga

hum us ko dekhte honge wo hum ko dekhta hoga

unhin ko haq hai jine ka jo marne se na ghabraen

jo jine se bhi ghabraen wo mar jaen to kya hoga

tujhe apna kahun ghairon ki mahfil mein ye na-mumkin

kabhi han be-KHudi mein main ne aisa kah diya hoga

tera hi nam hai lab par tera hi dhyan hai dil mein

KHuda kah dun tujhe hamdam to kya ye narawa hoga

na aana ho to KHwabon mein bhi aap aaen na ab hargiz

kisi furqat ke mare par karam ye aap ka hoga

mera hona na hona hai tumhaari bazm mein yaksan

na tha to tum ko kya gham tha na hunga main to kya hoga

muqaddar to muqaddar hai sar-e-taslim KHam kar de

bura hoga bhala hoga teri koshish se kya hoga

hamein bhi dekh len ek din kabhi wo mehrban ho kar

hamari zindagi mein 'sehr' kya ye moajiza hoga