bahaar aate hi daman-o-gireban jag uThte hain

bahār aate hī dāmān-o-girebāñ jaag uThte haiñ

gulistāñ karvaTeñ lete haiñ zindāñ jaag uThte haiñ

junūñ-afroz jab gesū-e-jānāñ jaag uThte haiñ

ḳhirad kī god meñ ḳhvāb-e-pareshāñ jaag uThte haiñ

kabhī jab dil meñ uThtī haiñ kisī kī yaad kī maujeñ

to ḳhvābīda tamannāoñ ke tūfāñ jaag uThte haiñ

damaktī haiñ kisī ke lab pe jab kirneñ tabassum kī

fazā.eñ chauñk jaatī haiñ gulistāñ jaag uThte haiñ

ġham-e-jānāñ se Dhaltā hai ġham-e-daurāñ kā ā.īna

ye vo qālib hai jis meñ qalb-e-insāñ jaag uThte haiñ

kabhī añgḌā.iyāñ letī haiñ jab vo naġhmagī nazreñ

nujūm-o-māh ke sāz-e-ġhazal-ḳhvāñ jaag uThte haiñ

mirī har saañs kī lau irtiqā kī lai hī gaatī hai

tirī aahaT se naġhmāt-e-rag-e-jāñ jaag uThte haiñ

koī ġham ho 'shifā' fitrat kā ik in.aam hotā hai

ki is se zindagī ke saare imkāñ jaag uThte haiñ

bahaar aate hi daman-o-gireban jag uThte hain

gulistan karwaTen lete hain zindan jag uThte hain

junun-afroz jab gesu-e-jaanan jag uThte hain

KHirad ki god mein KHwab-e-pareshan jag uThte hain

kabhi jab dil mein uThti hain kisi ki yaad ki maujen

to KHwabida tamannaon ke tufan jag uThte hain

damakti hain kisi ke lab pe jab kirnen tabassum ki

fazaen chaunk jati hain gulistan jag uThte hain

gham-e-jaanan se Dhalta hai gham-e-dauran ka aaina

ye wo qalib hai jis mein qalb-e-insan jag uThte hain

kabhi angDaiyan leti hain jab wo naghmagi nazren

nujum-o-mah ke saz-e-ghazal-KHwan jag uThte hain

meri har sans ki lau irtiqa ki lai hi gati hai

teri aahaT se naghmat-e-rag-e-jaan jag uThte hain

koi gham ho 'shifa' fitrat ka ek inam hota hai

ki is se zindagi ke sare imkan jag uThte hain