bahaar apni na gul apne na sehn-e-gulsitan apna

bahār apnī na gul apne na sehn-e-gulsitāñ apnā

banā leñ kyoñ na vīrāne meñ jā kar āshiyāñ apnā

sunā.eñ aah kis ko qissa-e-dard-e-nihāñ apnā

ab aatā hai nazar nā-mehrbāñ har meherbāñ apnā

batā.e kaun ġhurbat meñ hai kyā nām-o-nishāñ apnā

na koī ham-suḳhan apnā na koī rāzdāñ apnā

karishma jazb-e-ulfat kā ye dekheñ dekhne vaale

vahīñ manzil nazar aa.ī qadam uThThā jahāñ apnā

sharaf hāsil huā hai jab se us dar kī gadā.ī kā

zamīñ apnī falak apnā hai mehr-e-āsmāñ apnā

shu.ūr-e-āgahī goyā faqat lafz-o-bayāñ tak hai

hai sar-basta azal se aaj tak rāz-e-nihāñ apnā

gumāñ hai sīna-e-sozāñ meñ phūTe aable dil ke

sharar ban kar jo niklā chashm se ashk-e-ravāñ apnā

talāsh-e-yār aur is be-ḳhudī meñ 'zabt' kab mumkin

vo aalam hai batā sakte nahīñ ḳhud hī nishāñ apnā

bahaar apni na gul apne na sehn-e-gulsitan apna

bana len kyon na virane mein ja kar aashiyan apna

sunaen aah kis ko qissa-e-dard-e-nihan apna

ab aata hai nazar na-mehrban har meherban apna

batae kaun ghurbat mein hai kya nam-o-nishan apna

na koi ham-suKHan apna na koi raazdan apna

karishma jazb-e-ulfat ka ye dekhen dekhne wale

wahin manzil nazar aai qadam uThTha jahan apna

sharaf hasil hua hai jab se us dar ki gadai ka

zamin apni falak apna hai mehr-e-asman apna

shuur-e-agahi goya faqat lafz-o-bayan tak hai

hai sar-basta azal se aaj tak raaz-e-nihan apna

guman hai sina-e-sozan mein phuTe aable dil ke

sharar ban kar jo nikla chashm se ashk-e-rawan apna

talash-e-yar aur is be-KHudi mein 'zabt' kab mumkin

wo aalam hai bata sakte nahin KHud hi nishan apna