bahaar-e-kaif-agin maKHzan-e-alam hoti hai

bahār-e-kaif-āgīñ maḳhzan-e-ālām hotī hai

qafas kī sub.h se behtar chaman kī shaam hotī hai

gumāñ hotā hai maiḳhāne meñ jaise gir paḌī bijlī

qayāmat-ḳhez āvāz-e-shikast-e-jām hotī hai

girāñ hotī hai ai saaqī hamārī tab.a-e-rangīñ par

vo mahfil jis meñ taqlīd-e-mazāq-e-ām hotī hai

banegā āshiyāna bhī vahīñ par ham jahāñ hoñge

kahīñ āzādī-e-fitrat asīr-e-dām hotī hai

ye maanā ham-safar 'shā.ir' sañbhal kar paañv rakhte haiñ

magar duniyā kahīñ āsūda-e-ilzām hotī hai

bahaar-e-kaif-agin maKHzan-e-alam hoti hai

qafas ki subh se behtar chaman ki sham hoti hai

guman hota hai maiKHane mein jaise gir paDi bijli

qayamat-KHez aawaz-e-shikast-e-jam hoti hai

giran hoti hai ai saqi hamari taba-e-rangin par

wo mahfil jis mein taqlid-e-mazaq-e-am hoti hai

banega aashiyana bhi wahin par hum jahan honge

kahin aazadi-e-fitrat asir-e-dam hoti hai

ye mana ham-safar 'shair' sanbhal kar panw rakhte hain

magar duniya kahin aasuda-e-ilzam hoti hai