bahaar-e-mahfil-e-yaran sajai jati hai

bahār-e-mahfil-e-yārāñ sajā.ī jaatī hai

hamāre haath se ab pārsā.ī jaatī hai

añdherī raat meñ palkoñ pe diip jalte haiñ

tasavvurāt kī mahfil sajā.ī jaatī hai

chhupā chhupā ke chalo manzaroñ se āñkhoñ ko

ki is tarah bhī nazar kī safā.ī jaatī hai

ye kyā jagah hai jahāñ daaġh daaġh sīnoñ meñ

ḳhud apnī baat bhī ḳhud se chhupā.ī jaatī hai

har ek sub.h-e-tamannā kā shahr sajtā hai

har ek shab na.ī duniyā basā.ī jaatī hai

isī kā naam zamāne ne rakh liyā aañsū

ye merī pyaas jo āñkhoñ meñ aa.ī jaatī hai

har ek zehn meñ hotā hai rang-e-ḳhāk-e-vatan

zamīñ kī ḳhushbū zamīroñ meñ paa.ī jaatī hai

bacheñ to kaise bacheñ apne saa.e se 'nāshir'

badan kī dhuup muñDeroñ tak aa.ī jaatī hai

bahaar-e-mahfil-e-yaran sajai jati hai

hamare hath se ab parsai jati hai

andheri raat mein palkon pe dip jalte hain

tasawwuraat ki mahfil sajai jati hai

chhupa chhupa ke chalo manzaron se aankhon ko

ki is tarah bhi nazar ki safai jati hai

ye kya jagah hai jahan dagh dagh sinon mein

KHud apni baat bhi KHud se chhupai jati hai

har ek subh-e-tamanna ka shahr sajta hai

har ek shab nai duniya basai jati hai

isi ka nam zamane ne rakh liya aansu

ye meri pyas jo aankhon mein aai jati hai

har ek zehn mein hota hai rang-e-KHak-e-watan

zamin ki KHushbu zamiron mein pai jati hai

bachen to kaise bachen apne sae se 'nashir'

badan ki dhup munDeron tak aai jati hai