bahaar-e-zaKHm-e-lab-e-atishin hui mujhse

bahār-e-zaḳhm-e-lab-e-ātishīñ huī mujh se

kahānī aur asar-āfrīñ huī mujh se

maiñ ik sitāra uchhālā to nuur phail gayā

shab-e-firāq yūñhī dil-nashīñ huī mujh se

gulāb thā ki mahakne lagā mujhe chhū kar

kalā.ī thī ki bahut marmarīñ huī mujh se

baġhal se saañp nikāle to ho gayā badnām

ḳharāb achchhī tarah āstīñ huī mujh se

kahāñ se aa.ī hai ḳhushbū mujhe bhī hairat hai

ye raat kaise gul-e-āsmīñ huī mujh se

maiñ apne phuul khilā.e haiñ us kī jhāḌī par

qabā-e-yār bahut reshmīñ huī mujh se

bas ek bosa diyā thā kisī ke māthe par

tamām-shahr kī raushan jabīñ huī mujh se

ġhazal sunī to bahut dil se ḳhush huā 'ātif'

magar ġhazal kī satā.ish nahīñ huī mujh se

bahaar-e-zaKHm-e-lab-e-atishin hui mujh se

kahani aur asar-afrin hui mujh se

main ek sitara uchhaala to nur phail gaya

shab-e-firaq yunhi dil-nashin hui mujh se

gulab tha ki mahakne laga mujhe chhu kar

kalai thi ki bahut marmarin hui mujh se

baghal se sanp nikale to ho gaya badnam

KHarab achchhi tarah aastin hui mujh se

kahan se aai hai KHushbu mujhe bhi hairat hai

ye raat kaise gul-e-asmin hui mujh se

main apne phul khilae hain us ki jhaDi par

qaba-e-yar bahut reshmin hui mujh se

bas ek bosa diya tha kisi ke mathe par

tamam-shahr ki raushan jabin hui mujh se

ghazal suni to bahut dil se KHush hua 'atif'

magar ghazal ki sataish nahin hui mujh se