bahaar mein bhi shagufta koi gulab nahin

bahār meñ bhī shagufta koī gulāb nahīñ

shabāb kā hai zamāna magar shabāb nahīñ

sahar to aa.ī hai par sub.h-e-inqalāb nahīñ

ye āftāb kā dhokā hai āftāb nahīñ

lahūluhān chaman hai to dast pyāsā hai

kahāñ kahāñ pe karam aap kā janāb nahīñ

ḳhizāñ kā daur to guzrā ḳhudā ḳhudā kar ke

bahār aa.ī to mai-ḳhāne meñ sharāb nahīñ

ajiib hai tirī dariyā-dilī kā afsāna

ki faiz-e-ām hai aur koī faizyāb nahīñ

alam-nasīb ke chehre ko kaun paḌhtā hai

ki ye kitāb nashāt-āfrīñ kitāb nahīñ

junūñ ke saaz pe kar legā raqs dīvāna

balā se aaj agar naġhma-e-rabāb nahīñ

kisī kā bazm meñ ġhairat se dam ghuTā jaa.e

magar zamīr-faroshoñ ko kuchh hijāb nahīñ

bujhā sake na mazālim ke tund jhoñke bhī

charāġh-e-hausla-e-shauq kā javāb nahīñ

ḳharāb rahtā hai māhaul kyoñ ḳhudā jaane

is anjuman meñ to ab koī bhī ḳharāb nahīñ

'azīz' ḳhud ko bachāo nazar ke dhoke se

dhueñ kā raqs fazā meñ hai ye sahāb nahīñ

bahaar mein bhi shagufta koi gulab nahin

shabab ka hai zamana magar shabab nahin

sahar to aai hai par subh-e-inqalab nahin

ye aaftab ka dhoka hai aaftab nahin

lahuluhan chaman hai to dast pyasa hai

kahan kahan pe karam aap ka janab nahin

KHizan ka daur to guzra KHuda KHuda kar ke

bahaar aai to mai-KHane mein sharab nahin

ajib hai teri dariya-dili ka afsana

ki faiz-e-am hai aur koi faizyab nahin

alam-nasib ke chehre ko kaun paDhta hai

ki ye kitab nashat-afrin kitab nahin

junun ke saz pe kar lega raqs diwana

bala se aaj agar naghma-e-rabab nahin

kisi ka bazm mein ghairat se dam ghuTa jae

magar zamir-faroshon ko kuchh hijab nahin

bujha sake na mazalim ke tund jhonke bhi

charagh-e-hausla-e-shauq ka jawab nahin

KHarab rahta hai mahaul kyon KHuda jaane

is anjuman mein to ab koi bhi KHarab nahin

'aziz' KHud ko bachao nazar ke dhoke se

dhuen ka raqs faza mein hai ye sahab nahin