bahr-o-bar mein kalam us ka hai

bahr-o-bar meñ kalām us kā hai

zikr us kā hai naam us kā hai

sab ko detā hai vo sharāb apnī

hai jo gardish meñ jaam us kā hai

mahv-e-hairat haiñ dekhne vaale

itnā ūñchā maqām us kā hai

hai vahī harf harf tābinda

jis ke andar payām us kā hai

vo hai ġhā.eb magar azal hī se

har qadam par nizām us kā hai

rahguzar us ke qāfile us ke

raḳhsh bhī tez gaam us kā hai

ham to sab aarzī musāfir haiñ

jāvedānī qiyām us kā hai

kār-gāhoñ meñ dast-o-pā us ke

un se vābasta kaam us kā hai

kā.enāt us kī be-karāñ hai 'kañval'

jis meñ sab ehtimām us kā hai

bahr-o-bar mein kalam us ka hai

zikr us ka hai nam us ka hai

sab ko deta hai wo sharab apni

hai jo gardish mein jam us ka hai

mahw-e-hairat hain dekhne wale

itna uncha maqam us ka hai

hai wahi harf harf tabinda

jis ke andar payam us ka hai

wo hai ghaeb magar azal hi se

har qadam par nizam us ka hai

rahguzar us ke qafile us ke

raKHsh bhi tez gam us ka hai

hum to sab aarzi musafir hain

jawedani qiyam us ka hai

kar-gahon mein dast-o-pa us ke

un se wabasta kaam us ka hai

kaenat us ki be-karan hai 'kanwal'

jis mein sab ehtimam us ka hai