bahut chaha ki kuchh kah den zaban phir bhi nahin kholi

bahut chāhā ki kuchh kah deñ zabāñ phir bhī nahīñ kholī

kisī ke sāmne dil kī kabhī 'arzī nahīñ kholī

tumhārī yaad aa.ī to uḌegī niiñd rātoñ kī

isī Dar se zamāna ho gayā khiḌkī nahīñ kholī

hamārī bebasī paḌh kar gile sab duur ho jaate

magar afsos tum ne āḳhirī chiTThī nahīñ kholī

kamānā vyarth hai us kā amīrī vyarth hai us kī

munāsib vaqt par jis ne agar muTThī nahīñ kholī

bharosa uTh gayā jab se yahāñ chāragaroñ se phir

kabhī zaḳhmoñ se ham ne bhuul kar paTTī nahīñ kholī

vahī ab dam jo bhartā hai samundar naap lene kā

kabhī langar se us ne aaj tak kashtī nahīñ kholī

hazāroñ parchiyāñ yādoñ kī haiñ dil kī tijorī meñ

magar kanjūs man ne ek bhī parchī nahīñ kholī

bahut chaha ki kuchh kah den zaban phir bhi nahin kholi

kisi ke samne dil ki kabhi 'arzi nahin kholi

tumhaari yaad aai to uDegi nind raaton ki

isi Dar se zamana ho gaya khiDki nahin kholi

hamari bebasi paDh kar gile sab dur ho jate

magar afsos tum ne aaKHiri chiTThi nahin kholi

kamana wyarth hai us ka amiri wyarth hai us ki

munasib waqt par jis ne agar muTThi nahin kholi

bharosa uTh gaya jab se yahan chaaragaron se phir

kabhi zaKHmon se hum ne bhul kar paTTi nahin kholi

wahi ab dam jo bharta hai samundar nap lene ka

kabhi langar se us ne aaj tak kashti nahin kholi

hazaron parchiyan yaadon ki hain dil ki tijori mein

magar kanjus man ne ek bhi parchi nahin kholi