bahut dinon se meri un se rasm-o-rah nahin

bahut dinoñ se mirī un se rasm-o-rāh nahīñ

magar ye kaun kahe kis ke dil meñ chaah nahīñ

bas ab farishtoñ ko dars-e-gunāh de iblīs

ki ham bashar haiñ hameñ hasrat-e-gunāh nahīñ

hayāt-e-jāda-e-ġham se bhaTak ga.ī shāyad

ki aañkh meñ nahīñ aañsū laboñ pe aah nahīñ

ḳhayāl un kā hai vaj.h-e-sukūn-e-qalb-o-nazar

ye aur baat ki ab un se rasm-o-rāh nahīñ

gunāh-e-ishq kā maiñ murtakib sahī lekin

izāla jis kā na ho aisā ye gunāh nahīñ

banāo azm-e-safar hī ko rahnumā 'tālib'

na ho balā se agar koī ḳhizr-e-rāh nahīñ

bahut dinon se meri un se rasm-o-rah nahin

magar ye kaun kahe kis ke dil mein chah nahin

bas ab farishton ko dars-e-gunah de iblis

ki hum bashar hain hamein hasrat-e-gunah nahin

hayat-e-jada-e-gham se bhaTak gai shayad

ki aankh mein nahin aansu labon pe aah nahin

KHayal un ka hai wajh-e-sukun-e-qalb-o-nazar

ye aur baat ki ab un se rasm-o-rah nahin

gunah-e-ishq ka main murtakib sahi lekin

izala jis ka na ho aisa ye gunah nahin

banao azm-e-safar hi ko rahnuma 'talib'

na ho bala se agar koi KHizr-e-rah nahin