bahut ghabra rahe ho raushni se

bahut ghabrā rahe ho raushnī se

mohabbat ho ga.ī hai kyā kisī se

patā detī hai ye chehre kī rangat

ḳhudā ḳhush hai to bas ik aap hī se

shanāsā.ī nikal aa.ī purānī

nahīñ to kyoñ lipaTtā ajnabī se

zabāñ se yuuñ adā hotī hai urdu

surīlī taan jaise bāñsurī se

qadam donoñ taraf se baḌh chuke haiñ

mohabbat hogī rusvā vāpsī se

hañsī aa.ī kabhī yalġhār-e-ġham par

chhalak aa.iiñ kabhī āñkheñ ḳhushī se

bahut bā-zarf huuñ lekin pashemāñ

samundar bol uTThā tishnagī se

hifāzat kar na paa.e 'nazr' dil kī

churāyā hī gayā is sādgī se

bahut ghabra rahe ho raushni se

mohabbat ho gai hai kya kisi se

pata deti hai ye chehre ki rangat

KHuda KHush hai to bas ek aap hi se

shanasai nikal aai purani

nahin to kyon lipaTta ajnabi se

zaban se yun ada hoti hai urdu

surili tan jaise bansuri se

qadam donon taraf se baDh chuke hain

mohabbat hogi ruswa wapsi se

hansi aai kabhi yalghaar-e-gham par

chhalak aain kabhi aankhen KHushi se

bahut ba-zarf hun lekin pasheman

samundar bol uTTha tishnagi se

hifazat kar na pae 'nazr' dil ki

churaya hi gaya is sadgi se