bahut hasin baDi pur-bahaar guzri hai

bahut hasīn baḌī pur-bahār guzrī hai

vo zindagī jo sar-e-kū-e-yār guzrī hai

vahī ki jo thī sar-e-bazm ġhair kī jānib

vahī nigāh mire dil ke paar guzrī hai

nayā shagūfa hai khilne ko phir koī shāyad

chaman se bād-e-sabā sogvār guzrī hai

ye aur baat hai vo sah gayā use varna

dil-e-hazīñ pe ḳharābī hazār guzrī hai

na raaz pā sakī phir bhī ġham-e-mohabbat kā

rah-e-junūñ se ḳhirad baar baar guzrī hai

usī meñ un kī ḳhushī kā thā raaz poshīda

jo baat mujh ko bahut nāgavār guzrī hai

kuchh aisā rang jamāyā ḳhizāñ ne gulshan meñ

ki Dartī kāñptī fasl-e-bahār guzrī hai

samajh sakegā vahī mere ġham ko ai 'sāhir'

ki jis kī zindagī be-iḳhtiyār guzrī hai

bahut hasin baDi pur-bahaar guzri hai

wo zindagi jo sar-e-ku-e-yar guzri hai

wahi ki jo thi sar-e-bazm ghair ki jaanib

wahi nigah mere dil ke par guzri hai

naya shagufa hai khilne ko phir koi shayad

chaman se baad-e-saba sogwar guzri hai

ye aur baat hai wo sah gaya use warna

dil-e-hazin pe KHarabi hazar guzri hai

na raaz pa saki phir bhi gham-e-mohabbat ka

rah-e-junun se KHirad bar bar guzri hai

usi mein un ki KHushi ka tha raaz poshida

jo baat mujh ko bahut nagawar guzri hai

kuchh aisa rang jamaya KHizan ne gulshan mein

ki Darti kanpti fasl-e-bahaar guzri hai

samajh sakega wahi mere gham ko ai 'sahir'

ki jis ki zindagi be-iKHtiyar guzri hai