bahut hi bhale hain wafaon ke mausam

bahut hī bhale haiñ vafāoñ ke mausam

baḌe pur-asar haiñ duāoñ ke mausam

mohabbat kā qissa purānā huā hai

ab aane lage haiñ jafāoñ ke mausam

bhañvar meñ phañsā hai safīna hamārā

Dubo ke na rakh deñ gunāhoñ ke mausam

hai ḳhushbū sī phailī huī chāroñ jānib

baḌe dil-nashīñ haiñ adāoñ ke mausam

maiñ likhtā rahūñgā yūñhī sach hamesha

agarche haiñ aate sazāoñ ke mausam

kasak sī hai hone lagī dil meñ 'sāġhar'

ki aane lage haiñ ḳhizāoñ ke mausam

bahut hi bhale hain wafaon ke mausam

baDe pur-asar hain duaon ke mausam

mohabbat ka qissa purana hua hai

ab aane lage hain jafaon ke mausam

bhanwar mein phansa hai safina hamara

Dubo ke na rakh den gunahon ke mausam

hai KHushbu si phaili hui chaaron jaanib

baDe dil-nashin hain adaon ke mausam

main likhta rahunga yunhi sach hamesha

agarche hain aate sazaon ke mausam

kasak si hai hone lagi dil mein 'saghar'

ki aane lage hain KHizaon ke mausam