bahut kaThin tha magar faisla zaruri tha

bahut kaThin thā magar faisla zarūrī thā

so tai huā ki use chhoḌnā zarūrī thā

adāvatoñ meñ bhī iblāġh kī zarūrat hai

ki guftugū ke liye rābta zarūrī thā

bilā-javāz kise hijrateñ pasand magar

mohabbatoñ ke liye fāsla zarūrī thā

patā chalā ki vahī log haiñ ḳhasāre meñ

jinheñ yaqīñ ke liye mo.ajiza zarūrī thā

shikast khā ga.e jo jism the qavī haikal

muzāhimat ke liye hausla zarūrī thā

isī sabab se thā badnām shahr meñ 'ātir'

ki chup rahā na jahāñ bolnā zarūrī thā

bahut kaThin tha magar faisla zaruri tha

so tai hua ki use chhoDna zaruri tha

adawaton mein bhi iblagh ki zarurat hai

ki guftugu ke liye rabta zaruri tha

bila-jawaz kise hijraten pasand magar

mohabbaton ke liye fasla zaruri tha

pata chala ki wahi log hain KHasare mein

jinhen yaqin ke liye moajiza zaruri tha

shikast kha gae jo jism the qawi haikal

muzahimat ke liye hausla zaruri tha

isi sabab se tha badnam shahr mein 'atir'

ki chup raha na jahan bolna zaruri tha