bahut kya KHud se wahshat hai nahin to

bahut kyā ḳhud se vahshat hai nahīñ to

kyā har ik saañs zahmat hai nahīñ to

use jo dekh ke khil sā gayā hai

kyā phir jiine kī hasrat hai nahīñ to

akele-pan ke jangal ke o baasī

tū chāhtā kyā rifāqat hai nahīñ to

parāganda tire afkār saare

kyā in meñ koī nudrat hai nahīñ to

ye jazbe ye tire be-qābū jazbe

kyā in meñ koī shiddat hai nahīñ to

ye jo barbādī-e-dil sab huī hai

tujhe koī nadāmat hai nahīñ to

tire sar meñ uThī hai jo ye shorish

suḳhan is kī alāmat hai nahīñ to

bahut khul ke jo tū yuuñ jī rahā hai

tujhe marne kī ujlat hai nahīñ to

ḳhudī ko DhūñDhtā hai kyoñ tū ḳhud meñ

tujhe apnī zarūrat hai nahīñ to

tū ḳhud meñ Dūbtā kyoñ jā rahā hai

tujhe ḳhud se mohabbat hai nahīñ to

tirī sāñsoñ meñ kyoñ ye abtarī hai

kyā jiinā bhī mashaqqat hai nahīñ to

bahut kya KHud se wahshat hai nahin to

kya har ek sans zahmat hai nahin to

use jo dekh ke khil sa gaya hai

kya phir jine ki hasrat hai nahin to

akele-pan ke jangal ke o basi

tu chahta kya rifaqat hai nahin to

paraganda tere afkar sare

kya in mein koi nudrat hai nahin to

ye jazbe ye tere be-qabu jazbe

kya in mein koi shiddat hai nahin to

ye jo barbaadi-e-dil sab hui hai

tujhe koi nadamat hai nahin to

tere sar mein uThi hai jo ye shorish

suKHan is ki alamat hai nahin to

bahut khul ke jo tu yun ji raha hai

tujhe marne ki ujlat hai nahin to

KHudi ko DhunDhta hai kyon tu KHud mein

tujhe apni zarurat hai nahin to

tu KHud mein Dubta kyon ja raha hai

tujhe KHud se mohabbat hai nahin to

teri sanson mein kyon ye abtari hai

kya jina bhi mashaqqat hai nahin to