bahut ruswa mazaq-e-kohkan hai

bahut rusvā mazāq-e-kohkan hai

yahāñ har bul-havas ab tesha-zan hai

har ik siine har ik dil meñ jalan hai

pareshāñ anjuman kī anjuman hai

jinheñ maiñ chhoḌ kar aage baḌhā huuñ

unhīñ rāhoñ pe duniyā gāmzan hai

nigār-e-vaqt kī zulfeñ haiñ barham

mah-o-anjum ke māthe par shikan hai

sab ahl-e-kārvāñ pahchānte haiñ

amīr-e-kārvāñ ḳhud rāhzan hai

ḳhayāl-e-yār añgḌā.ī na lenā

abhī ġhāfil mirā dīvāna-pan hai

fazā-e-ḳhuld bhī dilkash hai lekin

tumhārī anjuman phir anjuman hai

junūñ kā saath vo kyā de sakegā

jise andesha-e-dār-o-rasan hai

nigāh-e-talḳh se kyoñ dekhte ho

tumhārā 'shāhid'-e-shīrīñ-suḳhan hai

bahut ruswa mazaq-e-kohkan hai

yahan har bul-hawas ab tesha-zan hai

har ek sine har ek dil mein jalan hai

pareshan anjuman ki anjuman hai

jinhen main chhoD kar aage baDha hun

unhin rahon pe duniya gamzan hai

nigar-e-waqt ki zulfen hain barham

mah-o-anjum ke mathe par shikan hai

sab ahl-e-karwan pahchante hain

amir-e-karwan KHud rahzan hai

KHayal-e-yar angDai na lena

abhi ghafil mera diwana-pan hai

faza-e-KHuld bhi dilkash hai lekin

tumhaari anjuman phir anjuman hai

junun ka sath wo kya de sakega

jise andesha-e-dar-o-rasan hai

nigah-e-talKH se kyon dekhte ho

tumhaara 'shahid'-e-shirin-suKHan hai