bahut sukun hai qanaat ki zindagi se mujhe

bahut sukūñ hai qanā'at kī zindagī se mujhe

qubūl kar liyā jo mil gayā ḳhushī se mujhe

vo aadmī jise samjhā thā maiñ ne abr-e-karam

sulagtā chhoḌ gayā vo bhī ḳhāmushī se mujhe

libās maiñ bhī pahan letā ajnabiyyat kā

agar ye jāntā milnā hai ajnabī se mujhe

mujhe ye fikr adhūrī hai us kī zaat magar

use ye zid ki mukammal kaho abhī se mujhe

vaqār thā mirī bātoñ meñ is liye bachcho

mire buzurg bhī sunte the ḳhāmoshī se mujhe

maiñ dushmanoñ se to bach kar nikal hī jā.ūñgā

hai ḳhauf apne hī andar ke aadmī se mujhe

harīf kaun thā ye kaisī jang thī tā-'umr

ki jis meñ haar hī jaanā paḌā kisī se mujhe

jise pasand na thī merī shaḳhsiyat 'kausar'

vo dekhtā rahā ehsās-e-kamtarī se mujhe

bahut sukun hai qana'at ki zindagi se mujhe

qubul kar liya jo mil gaya KHushi se mujhe

wo aadmi jise samjha tha main ne abr-e-karam

sulagta chhoD gaya wo bhi KHamushi se mujhe

libas main bhi pahan leta ajnabiyyat ka

agar ye jaanta milna hai ajnabi se mujhe

mujhe ye fikr adhuri hai us ki zat magar

use ye zid ki mukammal kaho abhi se mujhe

waqar tha meri baaton mein is liye bachcho

mere buzurg bhi sunte the KHamoshi se mujhe

main dushmanon se to bach kar nikal hi jaunga

hai KHauf apne hi andar ke aadmi se mujhe

harif kaun tha ye kaisi jang thi ta-'umr

ki jis mein haar hi jaana paDa kisi se mujhe

jise pasand na thi meri shaKHsiyat 'kausar'

wo dekhta raha ehsas-e-kamtari se mujhe