bahut sukun tha gham tha mere fasane mein

bahut sukūn thā ġham thā mire fasāne meñ

ye shīsha Tuut gayā dekhne dikhāne meñ

ye sach hamāre sahāre se chal nahīñ paayā

tabhī to Tuut gayā jhuuT ik bahāne meñ

bahut ġhurūr thā in bijliyoñ ko apne par

shikast khā ga.ī phir bhī is āshiyāne meñ

hamāre daur meñ insāniyat bhī bebas hai

bahut sukūn hai phir bhī sharāb-ḳhāne meñ

bahāreñ DhūñDh rahī thiiñ Thikāne gulshan meñ

juTī thiiñ titliyāñ māhaul ik banāne meñ

vo baat jis kā zamāne meñ koī zikr nahīñ

vo baat aa ga.ī kaise mire fasāne meñ

hamāre baa'd hameñ DhūñDhne chalī duniyā

hamārā koī badal hī nahīñ zamāne meñ

hamāre sach ko koī rāsta nahīñ detā

ye phaT na jaa.e kahīñ oḌhne bichhāne meñ

chalo sukūn se bad-nāmiyāñ hī tai kar leñ

isī hujūm ke tum bhī to ho nishāne meñ

bahut sukun tha gham tha mere fasane mein

ye shisha Tut gaya dekhne dikhane mein

ye sach hamare sahaare se chal nahin paya

tabhi to Tut gaya jhuT ek bahane mein

bahut ghurur tha in bijliyon ko apne par

shikast kha gai phir bhi is aashiyane mein

hamare daur mein insaniyat bhi bebas hai

bahut sukun hai phir bhi sharab-KHane mein

bahaaren DhunDh rahi thin Thikane gulshan mein

juTi thin titliyan mahaul ek banane mein

wo baat jis ka zamane mein koi zikr nahin

wo baat aa gai kaise mere fasane mein

hamare ba'd hamein DhunDhne chali duniya

hamara koi badal hi nahin zamane mein

hamare sach ko koi rasta nahin deta

ye phaT na jae kahin oDhne bichhane mein

chalo sukun se bad-namiyan hi tai kar len

isi hujum ke tum bhi to ho nishane mein