bahut wasi’ tha lekin simaT gaya hun main

bahut vasī’ thā lekin simaT gayā huuñ maiñ

ba-yak-qalam ka.ī hissoñ meñ baT gayā huuñ maiñ

mirī bisāt hai ik mauja-e-havā ya.anī

misāl-e-saf.ha-e-tārīḳh ulaT gayā huuñ maiñ

samajh rahā hai udhar vo sutūn-e-charḳh-o-zamīñ

idhar ye haal ki mehvar se haT gayā huuñ maiñ

tavālat-e-safar-e-dasht yak-qadam Thahrī

ki phir shurū’ kī jānib palaT gayā huuñ maiñ

zarūr ‘ishq meñ āmezish-e-havas hai 'zubair'

kabhī-kabhār jo ḳhud se lipaT gayā huuñ maiñ

bahut wasi’ tha lekin simaT gaya hun main

ba-yak-qalam kai hisson mein baT gaya hun main

meri bisat hai ek mauja-e-hawa yani

misal-e-safha-e-tariKH ulaT gaya hun main

samajh raha hai udhar wo sutun-e-charKH-o-zamin

idhar ye haal ki mehwar se haT gaya hun main

tawalat-e-safar-e-dasht yak-qadam Thahri

ki phir shuru’ ki jaanib palaT gaya hun main

zarur ‘ishq mein aamezish-e-hawas hai 'zubair'

kabhi-kabhaar jo KHud se lipaT gaya hun main