baiTha hun sar-e-rah tamasha-e-rawan hai

baiThā huuñ sar-e-rāh tamāshā-e-ravāñ hai

simTā huā piirī kī nigāhoñ meñ jahāñ hai

paayā tujhe jis ne tujhe har chiiz meñ paayā

paane kī yahī ek dalīl ek nishāñ hai

har vus.at-e-kaunain hai ik aañkh ke til meñ

ik harf meñ kun ke baham asbāb-e-fakāñ hai

ishrāk meñ aġhrāq meñ haiñ ān-o-davām ek

hai munjamid ik bahr to ik sarv ravāñ hai

urdu-e-muallā jise kahtā hai zamāna

vo virsa-e-aslāf hai vo merī zabāñ hai

us shaḳhs kī muTThī meñ hai sad-nau-e-karāmāt

'dīvāna' ki hai ḳhanda-jabīñ azb-e-bayāñ hai

baiTha hun sar-e-rah tamasha-e-rawan hai

simTa hua piri ki nigahon mein jahan hai

paya tujhe jis ne tujhe har chiz mein paya

pane ki yahi ek dalil ek nishan hai

har wusat-e-kaunain hai ek aankh ke til mein

ek harf mein kun ke baham asbab-e-fakan hai

ishrak mein aghraq mein hain aan-o-dawam ek

hai munjamid ek bahr to ek sarw rawan hai

urdu-e-mualla jise kahta hai zamana

wo wirsa-e-aslaf hai wo meri zaban hai

us shaKHs ki muTThi mein hai sad-nau-e-karamat

'diwana' ki hai KHanda-jabin azb-e-bayan hai