baiThe baiThe jo tabiat meri ghabrai hai

baiThe baiThe jo tabī.at mirī ghabrā.ī hai

aur shiddat se mujhe yaad tirī aa.ī hai

is se bichhḌuñgī to zinda nahīñ rah pā.ūñgī

merī mūnis mirī hamrāz ye tanhā.ī hai

justujū ab hai masarrat kī na to ġham kī talāsh

be-hisī mujh ko kahāñ le ke chalī aa.ī hai

Duub kar un meñ na ubhrā hai na ubhregā koī

jhiil sī āñkhoñ meñ pātāl sī gahrā.ī hai

mujh meñ har samt ziyā-bār haiñ un kī yādeñ

chāñdnī aaj mire dil meñ utar aa.ī hai

mujh se vo raah meñ katrā ke nikal jaane lage

maiñ ne bhī un se na milne kī qasam khaa.ī hai

shab-e-afsāna munavvar hai na ab shām-e-ġhazal

anjuman hai na kahīñ anjuman-ārā.ī hai

baiThe baiThe jo tabiat meri ghabrai hai

aur shiddat se mujhe yaad teri aai hai

is se bichhDungi to zinda nahin rah paungi

meri munis meri hamraaz ye tanhai hai

justuju ab hai masarrat ki na to gham ki talash

be-hisi mujh ko kahan le ke chali aai hai

Dub kar un mein na ubhra hai na ubhrega koi

jhil si aankhon mein patal si gahrai hai

mujh mein har samt ziya-bar hain un ki yaaden

chandni aaj mere dil mein utar aai hai

mujh se wo rah mein katra ke nikal jaane lage

main ne bhi un se na milne ki qasam khai hai

shab-e-afsana munawwar hai na ab sham-e-ghazal

anjuman hai na kahin anjuman-arai hai