baiThe hain teri bazm mein ek ajnabi se hum

baiThe haiñ terī bazm meñ ik ajnabī se ham

ai dost baaz aa.e tirī dostī se ham

ranj-o-malāl-e-yās-o-alam karb-o-iztirāb

kyā kyā na le ke aa.e haiñ terī galī se ham

ye aur baat hai ki mohabbat hai ham se duur

rakhte nahīñ haiñ dil meñ kudūrat kisī se ham

bal pech pai-ba-pai to shikan moḌ moḌ par

guzre haiñ maut hī kī tarah zindagī se ham

sunñe ko sun to lete haiñ ham har kisī kī baat

kahte nahīñ haiñ baat kisī kī kisī se ham

andāz aur bhī haiñ mulāqāt ke magar

milte haiñ aadmī kī tarah aadmī se ham

'bismil' hamārī samt bhī ik jaam to baḌhe

baiThe haiñ terī bazm meñ kis bekasī se ham

baiThe hain teri bazm mein ek ajnabi se hum

ai dost baz aae teri dosti se hum

ranj-o-malal-e-yas-o-alam karb-o-iztirab

kya kya na le ke aae hain teri gali se hum

ye aur baat hai ki mohabbat hai hum se dur

rakhte nahin hain dil mein kudurat kisi se hum

bal pech pai-ba-pai to shikan moD moD par

guzre hain maut hi ki tarah zindagi se hum

sunne ko sun to lete hain hum har kisi ki baat

kahte nahin hain baat kisi ki kisi se hum

andaz aur bhi hain mulaqat ke magar

milte hain aadmi ki tarah aadmi se hum

'bismil' hamari samt bhi ek jam to baDhe

baiThe hain teri bazm mein kis bekasi se hum