baja ki kashti hai para para thapeDe tufan ke kha raha hun

bajā ki kashtī hai paara paara thapeḌe tūfāñ ke khā rahā huuñ

magar ye e'zāz kam nahīñ hai ki aap hī apnā nāḳhudā huuñ

kabhī to maiñ ne dhunak diye haiñ pahāḌ bhī apne rāste ke

kabhī maiñ ḳhud apne rāste kī muhīb dīvāreñ ho gayā huuñ

mujhe hai shab-ḳhūñ kī fikr lekin unheñ halākat kā Dar nahīñ hai

mire qabīle ke log sote haiñ aur shab-bhar maiñ jāgtā huuñ

mirī haqīqat tazād kī is girah ke khulne pe munhasir hai

maiñ vaqt kā huuñ jalīl ḳhusrav maiñ ahd kā be-navā gadā huuñ

ye baat alag hai ki ġhuncha ġhuncha mire chalan se chaTak rahā hai

sabā kā jhoñkā huuñ gulsitāñ se maiñ be-sadā sā guzar rahā huuñ

jahāñ kā sheva sitam thā lekin mujhe vafā se rahī hai nisbat

jahāñ ġhalat thā ki maiñ ġhalat thā ye baat rah rah ke sochtā huuñ

mirī jabīñ kā chamaktā sūraj mire jilau meñ sadā rahā hai

maiñ raat kī zulmatoñ ko 'ārif' azal se lalkārtā rahā huuñ

baja ki kashti hai para para thapeDe tufan ke kha raha hun

magar ye e'zaz kam nahin hai ki aap hi apna naKHuda hun

kabhi to main ne dhunak diye hain pahaD bhi apne raste ke

kabhi main KHud apne raste ki muhib diwaren ho gaya hun

mujhe hai shab-KHun ki fikr lekin unhen halakat ka Dar nahin hai

mere qabile ke log sote hain aur shab-bhar main jagta hun

meri haqiqat tazad ki is girah ke khulne pe munhasir hai

main waqt ka hun jalil KHusraw main ahd ka be-nawa gada hun

ye baat alag hai ki ghuncha ghuncha mere chalan se chaTak raha hai

saba ka jhonka hun gulsitan se main be-sada sa guzar raha hun

jahan ka shewa sitam tha lekin mujhe wafa se rahi hai nisbat

jahan ghalat tha ki main ghalat tha ye baat rah rah ke sochta hun

meri jabin ka chamakta suraj mere jilau mein sada raha hai

main raat ki zulmaton ko 'arif' azal se lalkarta raha hun