baja ki paband-e-kucha-e-naz hum hue the

bajā ki pāband-e-kūcha-e-nāz ham hue the

yahīñ se par le ke mahv-e-parvāz ham hue the

suḳhan kā āġhāz pahle bose kī tāzgī thā

azal-rubā sā.atoñ ke hamrāz ham hue the

jahāñ se ma.adūm thī ḳhush-ā.indagī safar kī

vahīñ se ik lamha-e-tag-o-tāz ham hue the

yahāñ jo ik guuñj dā.ere se banā rahī hai

isī ḳhamoshī meñ sañg-e-āvāz ham hue the

ravāñ-davāñ inkishāf-dar-inkishāf the ham

jo muḌ ke dekhā to seġha-e-rāz ham hue the

ufuq thā raushan na murta.ish pāniyoñ pe kirneñ

ġhalat jazīroñ pe lañgar-andāz ham hue the

kuredte phir rahe haiñ ab ret sāhiloñ kī

vahī jo ġhota-zan-e-yam-e-rāz ham hue the

jumūd kā ek daur guzrā thā fikr-o-fan par

tavīl arse ke ba.ad phir 'sāz' ham hue the

baja ki paband-e-kucha-e-naz hum hue the

yahin se par le ke mahw-e-parwaz hum hue the

suKHan ka aaghaz pahle bose ki tazgi tha

azal-ruba saaton ke hamraaz hum hue the

jahan se madum thi KHush-aindagi safar ki

wahin se ek lamha-e-tag-o-taz hum hue the

yahan jo ek gunj daere se bana rahi hai

isi KHamoshi mein sang-e-awaz hum hue the

rawan-dawan inkishaf-dar-inkishaf the hum

jo muD ke dekha to segha-e-raaz hum hue the

ufuq tha raushan na murtaish paniyon pe kirnen

ghalat jaziron pe langar-andaz hum hue the

kuredte phir rahe hain ab ret sahilon ki

wahi jo ghota-zan-e-yam-e-raaz hum hue the

jumud ka ek daur guzra tha fikr-o-fan par

tawil arse ke baad phir 'saz' hum hue the