bala-kashon pe kahan pyas ka azab na tha

balā-kashoñ pe kahāñ pyaas kā azaab na thā

vahāñ pe manā thā paanī jahāñ sarāb na thā

shikast-e-ḳhvāb kā mātam thā chaar sū lekin

tamām shahr kī āñkhoñ meñ koī ḳhvāb na thā

na āstīnoñ pe miltā na ḳhāk-e-maqtal par

ḳhudā kā shukr hamārā lahū sharāb na thā

idhar gunāh udhar hasrat-e-gunāh kā bojh

fishār-e-qabr kī tamsīl thā shabāb na thā

bikā thā zehn o dil o jaañ samet manDī meñ

alag zamīr ke kyā daam the hisāb na thā

ba-tarz-e-ḳhās thī maqsūd mujh ko shohrat-e-ām

laboñ pe thā mire siine meñ inqalāb na thā

zamāna-sāz thā 'qaisī' na zar-shanās magar

aziiz kaise thā jo shaḳhs kāmyāb na thā

bala-kashon pe kahan pyas ka azab na tha

wahan pe mana tha pani jahan sarab na tha

shikast-e-KHwab ka matam tha chaar su lekin

tamam shahr ki aankhon mein koi KHwab na tha

na aastinon pe milta na KHak-e-maqtal par

KHuda ka shukr hamara lahu sharab na tha

idhar gunah udhar hasrat-e-gunah ka bojh

fishaar-e-qabr ki tamsil tha shabab na tha

bika tha zehn o dil o jaan samet manDi mein

alag zamir ke kya dam the hisab na tha

ba-tarz-e-KHas thi maqsud mujh ko shohrat-e-am

labon pe tha mere sine mein inqalab na tha

zamana-saz tha 'qaisi' na zar-shanas magar

aziz kaise tha jo shaKHs kaamyab na tha