bala se barq ne phunka jo aashiyane ko

balā se barq ne phūñkā jo āshiyāne ko

chaman meñ kyā hai pata chal gayā zamāne ko

kisī kā dar jo milā to kisī ke ho ke rahe

kisī ke vāste Thukrā diyā zamāne ko

urūs-e-zīst unhīñ ko gale lagātī hai

jo daar par bhī sunāte haiñ haq zamāne ko

ḳhulūs-e-dil na ho shāmil to bandagī kyā hai

zamāna khel samajhtā hai sar jhukāne ko

ubhar rahī thī jahāñ se hayāt-e-nau kī kiran

bulā rahā thā usī samt maiñ zamāne ko

badal sako to badal do hayāt ke tevar

lab-e-hayāt taraste haiñ muskurāne ko

uThā.ūñ barq ke ehsān kis liye 'faizī'

maiñ ḳhud hī aag lagā duuñ na āshiyāne ko

bala se barq ne phunka jo aashiyane ko

chaman mein kya hai pata chal gaya zamane ko

kisi ka dar jo mila to kisi ke ho ke rahe

kisi ke waste Thukra diya zamane ko

urus-e-zist unhin ko gale lagati hai

jo dar par bhi sunate hain haq zamane ko

KHulus-e-dil na ho shamil to bandagi kya hai

zamana khel samajhta hai sar jhukane ko

ubhar rahi thi jahan se hayat-e-nau ki kiran

bula raha tha usi samt main zamane ko

badal sako to badal do hayat ke tewar

lab-e-hayat taraste hain muskurane ko

uThaun barq ke ehsan kis liye 'faizi'

main KHud hi aag laga dun na aashiyane ko